काठमाडौं । नेपाल भारत वाणिज्य तथा उद्योग संघ (निक्की) ले जेनेस सोलुसन्सको सहकार्यमा होटल रोयल टुलिपमा “साइबर सुरक्षा तथा एआई: रणनीति, परिपक्वता र उदीयमान सुरक्षा चुनौतीहरू” विषयक केन्द्रित कार्यक्रम आयोजना गरेको छ। कार्यक्रममा व्यवसायी नेतृत्व, प्रविधि क्षेत्रका विज्ञ तथा सरोकारवालाहरूको सहभागिता रहेको थियो। नेपालका संस्थाहरूमा कृत्रिम बुद्धिमत्ता को तीव्र प्रयोग र बदलिँदो साइबर सुरक्षा जोखिमका प्रभावबारे छलफल तथा विश्लेषण गर्नु कार्यक्रमको मुख्य उद्देश्य रहेको थियो।

कार्यक्रमको सुरुवात जेनेस सोलुसन्सका कार्यकारी परामर्श सल्लाहकार तथा निक्कीको आईसीटी समितिका सल्लाहकार भीम ढकालको स्वागत मन्तव्यबाट भएको थियो। त्यसपछि निक्कीका उपाध्यक्ष  कुणाल कायलले उद्घाटन मन्तव्य व्यक्त गरेका थिए।

कार्यक्रममा जेनेस सोलुसन्सका प्रमुख प्रविधि अधिकृत निरञ्जन कुँवरले मुख्य प्रस्तुति दिएका थिए। उनले एआईको प्रयोगसँग सम्बन्धित उदीयमान साइबर जोखिम, क्लाउडमा बढ्दो निर्भरता, सुशासन, डेटा सुरक्षा तथा संस्थागत तयारीका विषयमा प्रकाश पारेका थिए। प्रस्तुतिपछि जिम्मेवार ढंगले एआई प्रयोग गर्दा देखिने व्यावहारिक चुनौती, साइबर सुरक्षा परिपक्वता, संस्थागत तयारी तथा मानव संसाधनको क्षमता लगायतका विषयमा जीवन्त प्रश्नोत्तर सत्र सञ्चालन भएको थियो।

कार्यक्रमको समापन एफएनसीसीआईका बोर्ड सदस्य तथा आईसीटी विकास समितिकी अध्यक्ष एवं जेनेस सोलुसन्सकी बिजनेस हेड सुनैना घिमिरे पाण्डेको धन्यवाद मन्तव्यबाट भएको थियो। कार्यक्रममा योगदान पुर्‍याएकोमा कुँवरलाई सम्मानस्वरूप  कुणाल कायलले कृतज्ञताको चिनोसमेत प्रदान गरेका थिए।

नेपालका डिजिटल अर्थतन्त्रलाई आकार दिइरहेका उदीयमान प्रविधि तथा समसामयिक विषयहरूमा व्यवसायिक क्षेत्रलाई सूचित र सार्थक संवादका लागि सहजीकरण गर्ने आफ्नो प्रतिबद्धतालाई निक्कीले पुनः पुष्टि गरेको छ।

This article is originally published on hamroartha.